E mërkurë, 12.12.2018
Impresum - Marketing - Arkiva - Kontakt

Yll Press

Fshati Shemshovë graviton në Komunën e Jegunovcës, ku mbi 40% janë shqiptarë si fshati Kopanicë dhe disa familje në fshatin Prelubisht. Edhe fshati Shemshovë në historiografi haset prej shekullit të XV përkatësisht me sa vijon; në vitin 1452/53 ku ka pasur 36 familje, 10 të pa martuar dhe një vejushë, më 1467/68 ka patur 45 familje, 3 të pa martuar dhe 7 vejushë, më 1481/82 ka patur 47 familje dhe 2 vejushe, më 1544/45 ka patur 20 familje, 6 të pa martuar dhe 1 vejushë dhe në vitet 1568/69 hasen 24 familje dhe 5 të pamartuar.
Shemshova, fshat i trimave që përballoi shumë padrejtësi








Prof. Ismet Jonuzi-Krosi

Botuar më: 2002


Në këtë fshat jetojnë këto familje; Lakushët, Lurasit, Muhaxherët, dhe Trakalaçët që thuajse gjysma e fshatit janë të kësaj familjeje. Ky fshat gjendet 13 km larg Tetovës, numëron mbi 300 shtëpi me shqiptarë dhe 27 shtëpi me maqedonas dhe afro 2000 banorë që nënkupton se mbi 90% jetojnë shqiptarë. Në këtë fshat, që shtrihet në fushën e Pollogut gjegjësisht disa kilometra afër autostradës Tetovë-Shkup apo atë të projektit G-8, ky fshat shtrihet në afërsi nga lindja prej 2 km të brigjeve të Lumit Vardar dhe kufizohet në perëndim me fshatin Zhillcë, në jugperëndim me fshatin Ozormishtë dhe në verilindje me fshatin Prelubishtë.

Si shumë fshatrat e tjerë edhe Shemshova ka Bashkësinë Vendore, shkollën fillore qendrore "Jumni Jonuzi" (që kohëve të fundit u çua shumë pluhur për asgjë, me rastin e ndërrimit të emrit të mëparshëm që e kishte, pasi ky është pishtari i arsimit nga ky fshat dhe rrethinë) e ndërtuar në vitin 1948, ndërkaq më parë kanë mësuar në fshatin Zhillcë dhe atë në gjuhën serbo-kroate, mësimin e ndjekin mbi 700 nxënës me 62 mësimdhënës, ku prej Shemshove janë gati 20 nëpunës, drejtor shkolle është Selman Aliti, Shemshova ka ambulancën e shëndetësisë që është ndërtuar në vitin 1968 dhe atë të stomatologjisë që ka filluar me punë prej vitit 2001 ku punohet me një ndërrim, me dy mjekë shqiptarë Adnan Ramadani nga Tetova dhe Hysni Rexhepi-stomatolog nga fshati Prelubishtë, dhe të punësuara pesë motra medcinale tri janë shqiptare dhe dy maqedonase, Zyrën e Vendit, Posta lokale ku përgjegjës është Xhelal Ademi i cili është edhe këshilltar komunal që është ndërtuar në vitin 1975, nënkuptohet se prej atëherë kanë edhe lidhje telefonike, ka një xhami e cila është rindërtuar në vitin 1969 ( kurse haset shënimi se kjo Xhami është rindërtuar në vitin 1890) dhe një kishë atë të Shën Gjergjit, e cila është ngritur në vitin 1913 në themelet e kishës së lashtë të të parëve të shemshovasëve, që janë në oborr njëra pranë tjetrës apo siç thonë banorët fisnikë se këto janë tonat me të cilat mburremi, ka Klubin Futbollistik "SHEMSHOVA ", që ndihmon në zhvillimin dhe ngritjen e vetëdijes sportive në këtë fshat që e kanë traditë me klubin në fjalë thuajse gati dy dekada.

Futbollistët e njohur, Nuri dhe Nebi Mustafi janë nga ky fshat
Edhe këtë fshat plaga e rëndë e kurbetit e përfshinë me mbi 30% popullatës që gjenden me punë të përkohshme jashtë vendit, që do të thotë se çdo shtëpi ka nga mërgimtarë. Më të përqendruar janë në vendet e Evropës si në Danimarkë, Itali, Gjermani, Zvicër, Norvegji e gjetiu dhe kanë një familje në Australinë e largët Azbi Shaqiri, të cilët gjithmonë kanë dhënë ndihmën që e ka dashur vendlindja e tyre. Si të gjitha fshatrat e Luginës së Pollogut edhe Shemshova ka karakteristikat e saja që e veçojnë nga fshatrat tjerë si në rrafshin e mburrjes së të kaluarës ku me pietet përmendin ushtarët në kohën e sundimit osman që në shekullin e XIX si Mehmetalit Ademin dhe Alit Alitin, Zejnullah Murselin dhe Adil Mazllami-Çaushi e shumë të tjerë të cilët kanë shërbyer në Jemenin e largët si ushtarë, si dhe vrasja gjegjësisht helmimi nga ana e sllavo-komunistëve i Mustafë Muharemit dhe Zilbehar Alitit në periudhën e Luftës së Dytë Botëror që për fat të keq ende mbeten të pandriçuara si krime, si në këtë fshat po edhe në tërë hapësirën e rajonit tonë me shumë krime të organizuara të vrasjeve dhe likuidimeve masive të njerëzve të pafajshëm vetëm e vetëm pse kanë dashur që çështja shqiptare të jetë në rend të parë e cila është një dëshmi e vazhdimësisë së ushtarëve dhe ushtarakëve të devotshëm ngase në luftën e vitit të kaluar nga ky fshat mori nam e lavdi komandat Baca me shokët e tij në Kalanë e Tetovës që sot është mburrje dhe krenari e të gjithë neve.

Po ashtu nga ky fshat në rrafshin e sporteve tradicionale si të pehlivanëve ende përmenden Alit Aliti në vitet 1950 së bashku me Jonuz Ibishin, në ruajtjen e traditave të valleve tipike te Pollogut, sot e sot përmendet Zejnullah Murseli që ka lënë gjurmë, më pas kavallisti i njohur Murtezan Murseli e tjerë. Mësuesit e parë që përmenden janë: Zija Shaqiri, Rexhep Asipi, Xhemal Asipi, Zija Murseli, Medi Ibishi, Selman Aliu ndërsa pietetin e pishtarit të arsimit e ka Jumni Jonuzi. Gjithashtu ky fshat sot ka edhe deputet republikan ing. i dip. Abdylhaqim Ademi, dhe shumë inxhinierë si Isak Ademi, Abdylhaqim Emurli, Rahman Aliti i cili është edhe drejtor i auto shkollës "FLORIDA" në Tetovë, kanë edhe tre inxhinierë të tekstilit, një juriste të diplomuar e cila ende është papunë, mjeku i fshatit Ilmi Jashari si dhe shumë e shumë intelektual thuajse në të gjitha segmentet e jetës dhe shkencës. Pas fillimit të ri në Maqedoni nga ky fshat në polici kanë të punësuar një policë të rregullt dhe tre rezervistë, pra nga ky fshat mund të themi se janë të punësuar vetëm 1%. Mbi 50% e banorëve marrin ndihma sociale. Pjesa dërmuese e cila merren me bujqësi gati 70% qumështin ua blen qumështorja nga fshati Xhepçisht "SENTI AG".

Po ashtu edhe blegtoria kultivohet në këtë fshat ku para tre dekadash kanë pasur mbi 2000 kokë dhensh, por për shkaqe të njohura të mungesës së ujit, ky segment tradicional ngadalë sikur shuhet edhe pse sot për sot me blegtori merret pensionisti i cili ka punuar më parë në Gjermani Imer Aliti, por si qahajë përmenden Shaban Sabriu, Mehmetali Ademi, Rauf Karimani, Minir Samiu dhe Hamdi Shaqiri si dhe të tjerë.

Rinia e fshatit, edhe pse me përgatitje adekuate arsimore si me të mesme dhe pjesa dërmuese me arsimim të lartë, nuk janë të punësuar apo vetëm simbolikisht janë në administratën shtetërore. Sektori privat i ekonomisë së ndërmarrjeve të vogla dhe të mesme është pak i zhvilluar ku aktualisht funksionojnë disa lokale afariste 4 kafene- ëmbëltore dhe 9 shitore. Si në shumë vende të tjera edhe në arat e këtij fshati një përqindje simbolike mbeten të papunuara që siç shprehen sa për nevojat klasike të jetës. Bujqit kultivojnë grurë, misër, speca, patate, domate, e kështu me radhë.
Zv/kryeministri i Maqedonisë, Abdilaqim Ademi, është nga ky fshat.


Është karakteristike se ky fshat i përmbushën të gjitha parametrat e një fshati me perspektivë ngase është për t'u përshëndetur se dekadën e fundit janë ndërtuar mbi 50 shtëpi të reja edhe pse posedojnë të drejtën e ndërtimit për hapësirë urbane. Në këtë fshat nuk është evident migrimi bile edhe nuk ka të shpërngulur në këtë lokalitet të lashtë, por siç kuptojmë se në vitet 1830 janë vendosur familje nga fshatrat e Përlepit dhe të fshatrave të Gostivarit si dhe përmendin se lagja e sotme që e quajnë Mëhalla e MUHAXHERËVE, janë të ardhur shqiptarët nga rrethina e Leskovcit, Medvegjës, Pllanës e kështu me radhë e të vendosur në Luginën e Pollogut e më gjerë dhe atë në kohën e luftërave austro-turke të viteve 1878 .

Përmes fshatit Shemshovë kalon rruga lokale në gjatësi prej 5 km. e asfaltuar në vitin 1994 nga shemshovasit,e që ka kushtuar mbi 40 mijë uero, pra, kjo rrugë lidhën fshatrat rrëzë Malit Sharr si Leshkën, Neproshtenin, Sllatinën dhe Tearcën, por kjo rrugë duhet sanuar sa më parë ngase është dëshmi e lashtësisë. Në qendër të fshatit kryqëzohen tri rrugë, ajo që të shpie për në drejtim të fabrikës së "Jugokromit" të Jegunovcës si dhe përskaj brigjeve të Lumit Vardar.

Çështja e ujit për pije dhe nevojave tjera jetike është problem i kah-moçëm, por shemshovasit me anë të pompave elektrike ku thuajse çdo familje ka hidroforin e vet. Siç kuptojmë nga kryetari i Bashkësisë Vendore, Rahman Aliti dhe këshilltarit komunal nga ky fshat se në koordinim edhe me këshilltarin tjetër nga ky fshat Selman Nuhiu kanë përgatitur projektin e ujit për pije që llogaritet se do të kushtojë mbi 250 mijë euro e këto mjete janë siguruar nga shitja e "Telekomit të Maqedonisë", nga Ministria e Qeverisjes Lokale, në këtë projekt respektivisht elaborat është gjetur nga ekspertët e hidrografisë vendi prej ku do të marrin ujë si dhe shpërndarja e rrjetit me anë të gypave është duke u realizuar ashtu siç është paraparë. Sipas parashikimeve pritet të kenë 15 litra ujë në sekondë me pompa-hidrofori që japin shtypje atmosferike, filtrimi i ujit dhe të gjitha mjetet tjera teknologjike që ky ujë të jetë i shëndetshëm për pije dhe amvisëri. Me këtë projekt shemshovasit llogaritin se për tre dekadat e ardhshme nuk do të kenë më kokëçarje për ujë të pijshëm.

Ky është projekt i llojit të vetëm në Luginën e Pollogut. Mbi 90% të Shemshovës janë me lidhje telefonike me atë të Postës së fshatit prej vitit 1975. Ndriçimi publik i këtij fshati është deri diku i rregulluar nga vetë Komuna e Jegunovcës. Rrugët janë të shtruara me asfalt me vetëkontributin e shemshovasve që nënkuptohet se është në shkatërrim e sipër e që kërkon sanime.

Prof. Ismet Jonuzi-Krosi
Por, bujqit e këtij fshati kanë një problem të përhershëm me ujërat për ujitjen e fushave edhe pse kanë mbi 100 hektarë tokë pjellore, kanë besim se një ditë edhe ky problem madhor do të zgjidhet në interes të bujqve, siç shprehet kryetari i Bashkësisë Vendore Rahman Aliti se toka jonë pjellore është në mjerim ngase ujitja kryhet me motorë privat të puseve të shumta nëpër fushë. Rendimentet e bollshme munden të jenë edhe më të mëdha në bujqësi, sikur të zgjidhet problemi i ujit edhe pse siç kuptojmë se mbi fshat apo në largësi prej 1 km kalon kanali për ujitjen e fushave dhe atë vetëm për bujqit e fshatit Zhillcë dhe Ratajë, shkaqet dihen ngase atje jetojnë popullatë sllave. Por, për këta banorë mbetet çështje e pazgjidhur ende kanalizimi i i ujërave fekale dhe atyre të zeza që janë rrezik permanent, edhe pse projekti është i gatshëm për tri fshatrat si atë të Shemshovës, Zhillcës dhe Ratajës e që realisht mund të kushtojë mbi 500 mijë euro, por, për këtë kërkojnë ndihma financiare si nga instancat e ndryshme shtetërore dhe të shoqatave të ndryshme ndërkombëtare që veprojnë tek ne. Autostrada Shkup-Tetovë -Gostivar që është e paraparë në projektin G-8, për banorët e këtij fshati është shpresëdhënëse se udhëtimi i nxënësve, studentëve dhe të punësuarve, për plasmanin e produkteve bujqësore nëpër ditët e tregjeve e kështu me radhë në Tetovë e më gjerë ndihmon pamasë. Është karakteristike se banorët e këtij fshati, Bashkësia Vendore dhe dy këshilltarët komunal i kanë të harmonizuara qëndrimet dhe kërkesat për të mirën e vet fshatit.

SHKOLLA FILLORE QENDRORE "JUMNI JONUZI"

Shkolla fillore qendrore "JUMNI JONUZI" ku mësimin e ndjekin mbi 700 nxënës. Ka të punësuar 62 arsimtarë, ku drejtor është Selman Aliti ( edhe pse ditëve të fundit është shkarkuar një anshëm nga ministria e arsimit, por këtë vendim të dëmshëm e politik banorët e Shemshovës e trajtojnë si gjest të ulët politik dhe nuk e pranojnë si të tillë). Shkolla e Shemshovës është ndërtuar në vitin 1948, ku kushtet për procesin edukativo-arsimor thuajse janë në gjendje relativisht të mira edhe objekti dykatësh që as për së afërmi nuk i plotëson kushtet.
Ky fshat me kërkesë të Bashkësive Vendore të Shemshovës, Kopanicës dhe Ozormishtit ngritën nismën që kësaj shkolle fillore qendrore t'ia ndërrojnë emrin nga ai i mëparshmi Dame Gruev në JUMNI JONUZI ( 1925-1987 ) i cili është pishtar i arsimit në këto anë, edhe pse u çua shumë pluhur për asgjë që ta etiketojnë personalitetin e arsimtarit të ndjerë se gjoja ka qenë kështu apo ashtu që për fat të mirë epilogu i gjithë kësaj mbaroi ditë më parë kur edhe solemnisht këtë shkollë e pagëzuan me emrin e këtij arsimdashësi i cili ka qenë edhe pjesëmarrës në Luftën e Dytë Botërore për të mirën e të gjithëve që jetojnë në këto fshatra për rreth Shemshovës ka qenë në aradhen e Brigadës së VII të komandant Qazim Luzha dhe atë me gradë ushtaraku që tërë jetën ia kanë mohuar Jumni Jonuzit, por kjo shkollë siç kuptojmë se në vitin 1948 e ka pas emrin Abdyl Frashëri, në vitin 1962 në Përparimi, kurse pavullnetin e banorëve padrejtësisht ka mbajtur emrin e një personaliteti të historisë së popullit maqedonas, ndërsa sot ka emrin që i takon dhe e meriton ky fshat.

Historiku i drejtorëve të shkollës së Shemshovës marrë nga Zenedije Ademi-studente; “Medi Ibishi, ka lindur më 7 prill 1954. Shkollën fillore e ka kryer ne fshat, gjimnazin në Tetovë. Akademinë Pedagogjike pranë Universitetit “Kirili dhe Metodi”, dega kimi-biologji. Ka diplomuar në vitin 1977. Për herë të parë është punësuar më 09.09.1975 si arsimtar në shkollën e fshatit Shemshovë. Në vitin 1993 është zgjedhur drejtor i shkollës “Dame Gruev”. Ka qenë drejtori i suksesshëm, gjatë kohës së tij ka bërë iniciativa për rregullim të zyrës së re,parkut të shkollës etj. Ka arritur të krijoi një harmoni në kolektivin e shkollës, pas përçarjeve të krijuara gjatë periudhës së Ivan Manovskit. Medi Ibishi, në postin e drejtorit ka qëndruar deri në vitin 2000, kur edhe vdes më 27 nëntor. Ja një radhitje e drejtorëve të shkollës: Trpko Cvetkovski (Leshkë), Sabri Qamili (Nerasht), Dragolub Leshnikovski (nga Maqedonia Lindore), Xhemal Asipi (Shemshovë), Ivan Manevski (Tetovë), Medi Ibishi (Shemshovë), Abdullah Qazimi (Tetovë) prej vitit 2000 dhe vazhdon deri tash.”

Po ashtu shkollimi i mesëm është bërë si shkollim i domosdoshëm që rezulton me vijimin masiv të shkollimit ku sot ka mbi 150 shkollarë e shkollare të mesme ku vlen të përmendet shkollimi i femrës. Nga ky fshat ka mbi 50 që ndjekin studimet si në UT, UEJL, në Shqipëri, Kosovë e gjetiu.

JETA KULTURORE DHE SPORTIVE

Klubi i Futbollit "SHEMSHOVA" , vend ku afirmohet rina e fshatit
Klubi i Futbollit "Shemshova", është i vetmi klub sportiv në këtë vendbanim. Është themeluar me iniciativë të aktivistëve të fshatit në vitin 1984, është anëtare Lidhjes Futbollistike të Tetovës, vite me radhë ka marr pjesë në gara në ligën komunale, ndërsa çdo herë është gjetur ndër ekipet më të suksesshme. Duhet thënë se nga sportistët e dalluar nga ky fshat është Nebi Mustafi, i cili ka luajtur në ekipin "Teteks", "Shkëndija" të Tetovës dhe aktualisht është anëtar i Slloga Jugomagnait nga Shkupi, ishte edhe anëtar i reprezentacionit të Maqedonisë, mirëpo lëndimi i rënd përkohësisht e largoi nga fusha e gjelbër. Nga KF "Shemshova" kanë dalë dhe dalin talente të rralla të futbollit, ndërsa ndër më të rinjtë është Nuri Mustafi, aktualisht anëtar i KF "Shkëndija HB". Pra, KF "Shemshova" është i vetmi vend ku afirmohet rinia e fshatit.

BASHKËPUNIMI ME QEVERISJEN LOKALE

Bashkëpunimi me qeverisjen vendore dhe me Komunën e Jegunovcës nëpërmjet dy këshilltarëve nga ky fshat, janë relativisht të mira. Siç thonë pjesa dërmuese se jemi të lënë anash nga institucionet e shtetit, nuk na shohin me sy të mirë, na vizitojnë në kohën e zgjedhjeve, na premtojnë dhe asgjë thuajse nuk realizojnë sa u përket problemeve madhore si të ujit për bujqësi, infrastrukturës, ujërave të zeza dhe ato fekale e kështu me radhë.

Shtabi për mbrojtjen civile gjatë tërë kohës së krizës së vitit të kaluar për fat të mirë kanë qenë syçelur për gjithçka. Por, gëzon fakti se gjallëria e bujqve që kryejnë obligimet e punëve të vjeshtës jep përshtypjen se këtu jeta ka marrë trajtën e rregullt. Si shumë fshatra të Pollogut edhe ky fshat me banorët e tij, janë optimist dhe shpresojnë për ditë më të mira dhe thonë mos dhëntë Zoti të përsëritet më viti i kaluar (2001).

Vendemërtimet:

Ura e Shpëtimit, Juria, Te leska, Te vorri i Axhës, Te Reka, Te Jasika e Madhe, Pllanishtja, Livadhet e Mdhoja, Ogjaret, Te arat, Mali I Qurtit, RReth jazit, Ndër udhë të Pilibishtit, Te vneshtat, Prekaqe, Te Dardha, Tileku, Bubicat, Xholi, udha e sherit, Sllatajnka, Ferishte etj.

Publikuar: 17.02.2011 | 23:46
Lexuar: 4877 herë
Printo PDF format Shto në,..

Komentet
jasir (18/02/2011 04:15:51) no coment pik per pike kshau asht bravooo ...!!!!
jashari (18/02/2011 20:03:33) haaaaaaaaaaaaaa ka shummmmmmmmmmmmmmmmm te pa vertet 50% e fshatit jan jasharoviq qe nuk i kan perfshir ne ket permbatje sidoqoft e certeta dihet nga vet katundaret 2001 kotribut me te madh kan dhen jasharoviqet pas tyre vin tjeret ju lutem mo manipuloni te pa verteta.
xpersonja (18/02/2011 20:08:03) asgje nuk jam kunder, veq nje gje e keni len anash, familja(mahalla jashari) nuk permendet askund,, ket e theksoj se ajo esht nje nder mahallat ma te medhaja,dhe nder ma te vjetrat,ku edhe nga kjo rjedhin trimat e fshatit , te cilet ishin nder te paret ne fillimin e luftes te 2001, duhet te jeni te drejt
une (19/02/2011 01:04:30) duhet edhe disa ndryshime te ky tekst ,shkolla fillore quhet Shemshova
shqiptari (08/11/2011 21:15:21) dicka e vertet dicka e pa cekur ne lidhje me kete feshat por besoj qe e verteta e feshatit dihet nga vet fshatar e jo nga indivitet qe kan dhen detaje per ket feshat me respekt shqiptari
sami (05/02/2013 15:35:29) une jam sami samiu nga fsh shemshove
XXXXXXXXX (26/02/2013 20:04:46) Edhee shaqerovicet jane mahalla e madhe po sashte permend edhe Rexhep Asipi sashte permend po shnosh jashar shaum te madhe e bojsh

Ndalohet përdorimi i gjuhës denigruese dhe fjalëve ofenduese ndaj individëve dhe ndaj grupeve specifike, si dhe komentimet që s`kanë të bëjnë me temën e artikullit. Moderatorët mbajnë të drejtën e fshirjes së komenteve që thyejnë rregullat e komunikimit.
Emri:
Email adresa:
Komenti:















Developed by: Just5 Studio
Rss furnizime