E premte, 14.12.2018
Impresum - Marketing - Arkiva - Kontakt

Yll Press

“Fotografia është pjesa më e bukur e artit pasi mbeten kujtim gjithë jetën dhe njeriu i kujton me shumë dashuri. Më herët profesionalizmi ka qenë më i dobët por dëshira për këtë profesion gjithmonë ka ekzistuar kurse në këtë kohë profesionistët e kësaj fushe me shumë pasion e bëjnë punën e tyre. Në një bisedë të cilën e realizuam për “Zëri”-n, rrëfehen disa nga fotografët më të njohur nga Kosova dhe Shqipëria. Petrit Ukëhajdaraj, Endrit Mërtiri, Erdi Mara, Sonny K. Elson dhe Arbër Hoxha flasin për përvojën e tyre në këtë profesion që nga ditët e para e deri tash”.
Flasin disa nga fotografet me te mire nga Shqiperia dhe Kosova











Pregaditit: Blerand Rexhepi







Petrit Ukëhajdaraj (Kosovë)

Petrit Ukehajdaraj


“Në fëmijëri të hershme kam filluar të vizatoj, aftësi të cilën besoj që e kam të trashëguar nga prindi. Si 14 vjeçar kam filluar të fotografoj jo për çeshtje materiale por thjeshtë e kam ndier këtë si nevojë shpirtërore”, tregon në rëfimin e tij për “Zëri”-n një ndër fotografët më të talentuar të Kosovës, Petrit Ukëhajdaraj. “Pas shkollës së mesme kam vazhduar studimet universitare në degën e ”Dizajnit grafik”, por akoma pa i përfunduar kam vazhduar në fushën e artit dramatik dega “Kinematografi-kamerë”. Fillimet në këtë profesion kanë qenë shumë të vështira, tregon ai. “E vështirë ka qenë në fillim, por edhe më e vështirë është tash puna si artist dhe fotograf në përgjithësi, pasi që rezultati final i punës time nganjëherë varet prej kompromisit që arrihet në mes të kërkesave të klientit dhe mënyrës se si unë punoj. Gjithmonë më ka ndihmuar familja dhe ende vazhdon të më ndihmojë në këtë drejtim”, thekson fotografi. “Fotografitë që unë i realizoj kanë të bëjnë me personalitetin tim, me gjendjen emocionale, morale dhe shpirtërore dhe asnjëherë nuk i kam trajtuar si biznes. Në rastet kur kam kërkesë të fotografoj apo të krijoj për klient të ndryshëm gjithmonë provoj të jem i arsyeshëm varësisht prej kërkesës së punës dhe kushteve që punoj”. Petriti është njëri ndër fotografët që para aparatit së tij kanë kaluar shumë fytyra publike. “Kam fotografuar fytyra të ndryshme të fushave të modës, estradës, kinematografisë, e deri tek ato më të larta të politikës, por kurrë nuk kam bërë dallime në mënyrën se si i trajtoj. Për mua të gjithë janë në qendër të veprës që e krijoj. Ai flet edhe për kualitetin që ka qenë më herët dhe kushtet të cilat punohet tash në këtë fushë. “Nëse shtrohet pyetja për fotograf komercial në përgjithësi, atëherë është çështja e kohës, kërkesës dhe shoqërisë e cila i bën artistët të ndryshojnë dhe patjeter se ka dallime por, nuk mund ta dimë se a janë pozitive apo negative, janë më shumë çështje teknike, e nëse shtrohet pyetja për mua personalisht atëherë mund të them një gjë se gjithmonë kam qenë i sinqertë me vetëveten, nuk jam bazuar në rrethana materiale, kohore, teknike. Gjithmonë kam tentuar që asnjë seri fotografike të mos jetë e njejtë, kam gjetur inspirime të freskëta dhe gjithmonë kam krijuar diçka shumë të veçantë e të bukur”, tregon Ukëhajdaraj për punën e tij si fotograf. Rreth punës që e bën, ai ka udhëtuar nëpër shumë vende të botës ku dhe ka gjetur inspirimin e tij, për të punuar gjëra të reja dhe interesante. “Gjatë veprimtarisë time kam udhëtuar dhe vazhdoj të udhëtoj nëpër shumë vende të botës. Kjo më ka dhënë gjithmonë shumë insipirim dhe ka ndikuar që të pasuroj mendjen në kultura dhe kushte të ndryshme të jetës dhe punës në përgjithësi. Si fotograf jam plotësisht i kompletuar dhe besoj që pa dallim se ku jetoj, puna ime gjithmonë do ta reflektoj talentin, motivimin dhe vetëveten time. Përveç fotografisë dhe kinematografisë, si amator luaj në kitarë por akoma nuk kam publikuar dhe nuk besoj që do të publikoj ndonjë vepër. Shumicën e kohës e kaloj duke punuar si fotograf, njëkohësisht jam në kërkim të subjekteve dhe temave të ndryshme të cilat pasurojnë punën time artistike”, përfundon rrëfimin e tij për “Zëri”-n fotografi i njohur Petrit Ukëhajdaraj.

Endrit Mërtiri (Shqipëri)

Endrit Mertiri


Derisa për fotografin nga Shqipëria, Endrit Mërtirin hyrja në këtë biznes nuk ka qenë aspak problem. “Nuk ka qenë aspak e vështirë për mua, çdo gjë më ka ecur mirë, kurse në lidhje me punën time më ka ndihmuar familja”. Ai tregon se puna që e bën është shumë fitimprurëse pasi ka zgjedhur të ushtroj këtë profesion. “Është fitimprurëse për aq kohë sa kam zgjedhur të jetoj me këtë profesion”. Endriti deri më tani ka fotografuar shumë fytyra publike por nuk ka asnjë të veçantë dhe për zemër. “Kam fotografuar shumë, nuk dua të përmend emra pasi mund të lë ndonjë pa përmendur, por deri më tani
nuk kam pasur asnjëherë probleme me asnjeri, por edhe nuk kam preferencë të caktuara për të fotografuar dikë”. Me vite rritet edhe kualiteti i fotografive, rrëfen Endriti i cili edhe pse është akoma i ri, këtij biznesi i ka hyre që moti. “Sigurisht që ka ndryshime, me vite rritet edhe kualiteti i fotove. Gjithçka që më herët e kanë bërë, tash mund të bëhet më ndryshe për shkak të profesionalizmit”. Ai pëlqen vetëm Shqipërinë për të vazhduar punën e tij. “Nuk kam preferenca të caktuara edhe për vendet, por më pëlqen shumë Shqipëria dhe padyshim që këtu do ushtroj profesionin tim si fotograf. Endriti momentalisht është duke punuar për revisten dhe agjensionin “AS” dhe është shumë i kënaqur me punën dhe kushtet që i ofrohen aty. Fotografi i talentuar gjithashtu është duke vazhduar studimet për pikturë.

Erdi Mara (Shqipëri)

Erdi Mara


“Tashmë u bënë rreth shtatë vite që merrem me këtë profesion. Në fillim nuk lindi si i tillë por si hobi për të fiksuar me aparat “të bukurën”. Synimi i asaj kohe ishte të bëja diçka ndryshe nga ajo që bënin të tjerët, (të bëja foto që nuk kishin nevojë për shpjegim, foto që “flasin” vetë). Fatmirësiht më vonë kjo do të shëndrrohej edhe në profesionin tim dhe nuk ka gjë më të bukur kur në punë bëjmë gjërat që na pëlqejnë”, flet për “Zëri”-n fotografi nga Shqipëria, Erdi Mara. Fillimet kanë qenë relativisht të vështira sepse ekziston konkurrenca siç ndodh rëndom me çdo profesion por, që seleksionimin e bën puna dhe koha. Këmbëngulja nga ana ime ka qenë maksimale dhe sigurisht kjo bëri që edhe faza e vështirësisë të kalonte me sukses. Nëse në shumicën e rasteve shumë njerëzve puna ju sigurohet nga sfera e njerzëve që njohin, në rastim tim nuk ka ndodhur kështu. Ato që më kanë ndihmuar kanë qenë besimi tek vetja dhe ambicia për të arritur çdo gjë sado e vështirë që mund të ketë qenë. Jam besnik i idesë që nuk ka asgjë të pamundur nëse përpiqesh sa duhet. Pagesa, jo gjithmonë përkon me punën e bërë por gjithsesi mund të them se është relativisht e mirë nisur edhe nga fakti që punoj për një nga mediat e shkruara më të mëdha dhe më të sukseshme në Shqipëri. Fotografi Mara gjithë këtë sukses e ka arritur falë punës së mirë. “Përsa i përkët asaj se nëse ja vlen apo jo të jesh fotograf këtu në Shqipëri duhet të marrim parasysh një sërë faktorësh siç janë media për të cilën punon, profili që ke ti si fotograf dmth nëse thjesht bën foto të zakonshme të aktiviteteve që duhet të pasqyrohen apo ke profilin e një “paparaci”, pavarsisht këtyre në fund ajo që bën vlerësimin është produkti që sjell. Një eksperiencë mesatarisht e gjatë prej shtatë vitesh si fotograf më ka dhënë mundësinë që të fotografoj të gjithë personalitetet publike brenda territorit shqiptar që i përkasin fushave të ndryshme duke filluar nga arti e deri tek politika e sporti”. Derisa për fotografin Arbër Hoxha ishte ëndër të fotografojë Eliza Dushkun, në anën tjetër Erdi Mara tashmë ka bërë një gjë të till. “Mund të them që kam fotografuar edhe një pjesë të mirë të artistëve që jetojnë në diasporë që është një kontigjent goxha i madh. Kurse përsa u përket personaliteteve të huaj kam patur mundësinë të fotografoj këngëtarin: “Akon, Rio, Eliza Dushkun, James Belushin, James Blunt, Mikele Placido, David Beckam, Kaka, Christiano Ronaldon” etj. Përsa u përket problemeve në punë nganjëherë profesioni ynë keqkuptohet dhe kjo sjell edhe incidente ose probleme me personalitetet e fotografuara, por ky është një risk që meret parasysh që në fillim. Pavarësisht problemeve kjo gjë nuk më ka bërë asnjëherë pessimist që të mendoj të heq dorë nga ky profesion. Sigurisht që gjërat kanë ndryshuar. Dikur kërkesa ishte më modeste dhe përpjekja më minimale për të gjetur një personazh që ia vlente të fotografohet. Sot tregu nuk toleron dhe duhet të japësh maksimumin në gjithcka. Viteve të fundit është shfaqur trendi i të qenit “paparac” dhe fotove “pikante” dhe në fakt gjithçka për një fotograf rrotullohet rreth kësaj. Ajo që them me bindje është që cilësia është rritur shumë herë më shumë sesa ka qenë.Në Milano dëshiron të punojë Erdi Mara, ”atje është vendi ideal që do të doja të ushtroja këtë profesion, janë një sërë gjërash që më bëjnë të mendoj kështu ku mund të përmend faktin që puna e fotografit aty është shumë e vlerësuar, qendrat e perendorive të modës që janë të vendosura aty tërheqin një numër të madh të personaliteteve publike botërore çka është shumë pozitive për një fotograf. Por, gjithsesi nuk i kam humbur shpresat, përkundrazi ky është edhe synimi im të cilin pse jo mendoj se do ta realizoj së shpejti. Momentalisht jam i impenjuar pranë gazetës “Panorama”.

Sonny K. Elson (Shqipëri)

Sony K. Elson


“Fillimet e mia kanë qenë pak a shume si çdo njeri, kuriozitet dhe dëshira për të provuar diçka tjetër. Aparati i parë fotografik mu dhurua nga një italian, biles dhe atëherë nuk bëja foto të stampuara po diapozitiva që i shikonim në mur”, tregon fillimet e tij fotografi shqiptar i cili bën karierë në Itali, Sonny K. Elson. Nga kurioziteti u shënderua në pasion dhe kjo më ka ndihmuar dhe vazhdon të më ndihmojë edhe sot. E vështirë ka qenë disi, flas sidomos në Itali, në një vend ku fotografia është shumë më përpara dhe se konkurenca gjithashtu e madhe. Akoma më vështirë për faktin që unë nuk bëra një shkollë të mirëfilltë për fotografinë, por jam autodidakt, shumë gjëra i kam marrë duke frekuentuar fotograf të tjerë, duke ndjekur “ëorkshop” të ndryshëm, internet, dhe një sasi të konsiderueshme revistash dhe librash që kanë lidhje me fotografinë. Nuk di te them nëse kjo punë është fitimprurëse apo jo, pasi për momentin nuk më duket keq, por mos harrojmë se si çdo profesion tjetër ka anët e lehta dhe të vështira, pastaj dhe fakti që shumë herë duhet të ndryshojmë mjetet e punës dhe çmimet për këto materiale nuk janë shaka, thekson ai. Them se fotografia në Shqipëri po merr një hov shumë të madh dhe dëshira për foto po shtohet dita ditës, kjo lidhet dhe me faktin që janë shtuar aktivitete të ndryshme, flas këtu për revista, gazeta, tv, reklama dhe shumë të tjera pasi kanë nevojë që nëpërmjet fotografisë të shprehin ose të dërgojnë disa mesazhe për publikun ose konsumatorin. Sipas mendimit tim ia vlen të bësh këtë punë, shtohen fotografët, shtohet kualiteti i punëve që bëhen dhe konkurrenca në këtë rast ndihmon shumë në përmiresimin e punës personale. Të them të drejtën kam vetëm 4 muaj që jam në Shqipëri dhe personazhet që kam fotografuar kanë qenë për bashkëpunimet që kam pasur për revista të ndryshme si “Psikologjia”, “Vip”, “Jeta media”, kompani ku aktualisht punoj, nuk di nësë ka shumë rëndësi emrat, por kjo është një pjesë që preferoj të mbaj për vete. Për momentin nuk kam pasur ndonje problem si për setet private si me personazhe në evente të ndryshme, ndoshta dhe për faktin që nuk jam në rolin e paparacit. Në momentin që drejtoj objektivin, njerëzit më shikojnë dhe i shikoj. Është e qartë se pas 10 viteve kam ndryshuar shumë sa që fotot e disa viteve më parë më duken aspak kualitative, por jam i dashuruar me to sepse kanë qenë punët e para, pasioni i parë, gjë që tani është zëvendësuar me kualitetin sepse edhe puna që bëj është më ndryshe. Profesionin e fotografit nuk e di pse po më pëlqente ta bëja në Francë, nuk di të them sinqerisht pse në këtë vend, por me tërheq shumë, jo se nuk më pëlqen ta bëj këtë punë në Shqipëri, ndoshta thjeshtë një ëndërr tjetër që kam pasur në lidhje me fotografinë. Aktualisht punoj për “Jeta media company”, që ndodhet në treg me 7 revista, por edhe pse ngarkesë e madhe për mua, unë merrem edhe me aktivitete tjera që lidhen me modën, reklama, evente të ndryshme etj, tregon fotografi Sonny K. Elson.

Arbër Hoxha (Kosovë)

Arber Hoxha


“Si çdo profesion profesion tjetër në Kosovë edhe ky profesion është shumë i vështirë në fillim, në veçanti kur ke të bësh me artin, meqë nuk ke përkrahje nga askush, dhe çdo ëndërr dhe kreativitet qe to ta realizosh duhesh të bazohesh vetëm e vetëm në mundësit e tua, por dashuria dhe pasioni qe kam për këtë profesion më ka lehtësuar përpjekjet për të arritur këtu ku jam sot”, rrëfen i pasionuar për profesionin e tij fotografi Arbër Hoxha. Por, hapat e parë në këtë profesion sot i konsideroj si një revulucion për jetën time, dhe jam shumë i kënaqur me të gjitha arritjet. Vështirësi më e madhë ka qenë depërtimi në botën e modës dhe modelimit profesional, sepse në Kosove kemi fotograf jashtëzakonisht të aftë dhe të avancuar, andaj më është dashur një punë shumë e madhe për të treguar aftësitë e mia profesionale, thotë Arbëri në rrëfimin e tij për “Zëri”-n. Të shumtë janë ata që më ndihmuan dhe nuk do ti harroj kurrë, ndër ata qe do doja ti përmendi janë: “Agnesa Vuthaj dhe motra e saj Sokolesha, të cilat më ndihmuan shumë me këshillat dhe më prezantuan me shumë fytyra publike shqiptare dhe të huaja ndër ato edhe me modelen Buqe Çitakun, e cila është ndër modelet e para me të cilat kam punuar, dhe gjithë të tjerat që kanë qenë dhe vazhdojnë të jenë pjesë e suksesit tim”. “Në fakt unë e kam një filozofi pak më ndryshe, paguhem nga korrja e suksesit, nga bukuria e punës së bërë. Por, nëse është fjala për të punuar për ndonjë revistë apo për ndonjë ngjarje kulturore, nuk është fitimprurëse aspak, sepse siç e kam cekur edhe me lart, të gjithë ata të cilët e duan artin me të vërtet duhet të nisen vetëm nga buxheti i tyre vetanak ose me sponsor që nuk është aspak e lehtë ti gjejsh, dhe nuk ka ndonjë fitim të madh, ndërsa kur bëhet fjalë për punë me qëllime të marketingut atëherë është mjaft fitimprurëse, andaj e konsideroj për ata që vërtetë e duan këtë punë, ia vlen që të merren me këtë profesion sepse edhe në vendin tonë nuk është komplet i vdekur, fatmirësisht po shkon drejt një përmirësimit dhe avancimit te kënaqshëm”. “Të shumtë janë emrat e fytyrave publike që unë kam fotografuar, por do i përmendi disa: “Agnesa Vuthaj, Buqe Çitaku, Shkëndije Mujaj, Altuna Sejdiu, Greta Koçi, Ryva Kajtazi, Burim Hoxha, Don Pizhi, Yllka Berisha e shumë të tjerë”. Ndërsa nga ato që ende nuk i kam fotografuar dhe që vërtetë kam shumë dëshirë ti fotografoj janë: “Bleona Qereti, Çiljeta Xhilaga dhe shqiptaren e madhen me famë ndërkombëtare Eliza Dushkun”. Arbëri deri më tani tregon se ka kalur shumë bukur në punën e tij me këta persona dhe nuk ka pasur asnjë problem. “Unë për nga natyra jam shumë i bute dhe është gati e pamundur të kesh problem me mua, por ka disa nga ato që unë i kam fotografuar por nuk jam i kënaqur më, me arsye se kanë kërkuar qe tu bëj fotografitë në atë mënyrë që e then etikën e fotografisë, andaj kjo më pengon shumë, pasi si çdo punë tjetër profesionale edhe fotografia e ka etiken dhe rregullat e veta që duhet ti përmbahemi, tregon fotografi Hoxha. Ai gjithashtu thekson se më herët kur nuk përdorur photoshop-i dhe tash kur photoshop-i ka marë rolin kryesor, ka shumë dallime. “Dallimi i vetëm është se më parë kanë punuar pa photoshop program për të bërë pothuajse magji me fotografi dhe normal falë kësaj e shumë programeve të tjera për montazhin e fotografisë, kualiteti sot është shumë me i mirë se sa më herët, ndërsa nga aspekti artistik nuk ka shumë dallime sepse pasioni është njësoj dhe talenti – talent, andaj dallimi është i vogël, por në çdo aspekt sot fotografia bëhet më e mirë. “Dëshira ime është të rri në vendin tim në Shqipërinë time të madhe, sepse ke vërtetë se çfarë të fotografosh dhe ke me kë të punosh, por kriza ekonomike e cila është në vendin tonë, normal na detyron që të bëjmë lëvizje gjithandej për ekzistencë. Në tetor të këtij viti do të filloj të punoj në Dubai dhe Abudabi, me një agjension mode atje, fal një bashkatdhetarie e cila më ka mundësuar këtë punë, dhe më pas do mundohem të shkoj në botën e artit në Neë York. Për momentin jam duke punuar për KFOR-in Danez si punë primare, ndërsa po përgatitemi për një projekt tjetër këtu në Kosovë. Jeta ime është e lidhur ngushtë me fotografinë, dhe çdo herë bëj udhëtim e fotografim.

Publikuar: 25.12.2009 | 08:40
Lexuar: 5902 herë
Printo PDF format Shto në,..

Komentet
daku (25/12/2009 22:12:55) sa bukur qe ka fol ky erdi...........i raft pika budallait...
valon maliqi (02/12/2010 23:10:09) ARBER ME TVERTET JE NJE TALENT SHUM I MADH EDHE ENDE ESHTE FILLIMI I PERSONALITETIT TEND QE KAN PER TE ZBULUAR.
Agnesa (31/07/2017 23:42:59) Un dua t behem nje fotografe por nuk e di se si kam shum deshir t merrem me art por nuk km kushte dhe m pelqen shumm qe t bej fotografi ngado qe jam kerkoj sh faqe por nuk gjej ndokund mund t me thoni ju disa fjale

Ndalohet përdorimi i gjuhës denigruese dhe fjalëve ofenduese ndaj individëve dhe ndaj grupeve specifike, si dhe komentimet që s`kanë të bëjnë me temën e artikullit. Moderatorët mbajnë të drejtën e fshirjes së komenteve që thyejnë rregullat e komunikimit.
Emri:
Email adresa:
Komenti:















Developed by: Just5 Studio
Rss furnizime